السلام عليكم -- صبحكم الله بالخير أغاتي شلونكم شخباركم الكل بخير الحمد والشكر لله
اليوم الريوك معروف ميحتاج لف ودوران -- اليوم كاهي وكيمر لئن اليوم الخميس
ياله نتوكل بالله -- ياله نتوكل وين نتريك منوا أضبط كاهي وكيمر واذا موا كاهي ويا الكيمر عسل طبيعي لو دبس كربلاء منوا اللي أيدمهن يا مطعم -- ها اذكرت اكوا مطعم بدون اسم بالكرادة داخل صاير بدخله صغيرة يعني وجه المحل موا لزك على الشارع أشويه راجع ليوره وحتى الكعده مالته قنفات أكثر شي -- والله مدى أعرف اسمه بالضبط بس بالضبط انته ورايح للكرادة داخل من يم كهرمانة أيصير بعد الأورزدي يمة أو ميتين متر بس أسئلوا الكل أيدلوكم -- أي وصلنه المطلوب -- السلام عليكم وعليكم السلام ورحمة الله وبركاته عيوني مية هلا تفضلوا أحستريحوا --- كعدوا --الله ابو الخير ردو الله ابو الخير -- شتاكلون - يابه جيب صينية متوسطة كاهي وكيمر واربع مواعين صغيرة وكل ما عمون شكله قطعتين كيمر عليه عسل وقطعتين كيمر عليها دبس
أجه الطلب وأجه وياه الصمون الحار المنفوخ والمكسب أتكول كيك عبالك -- بالمناسبة ترى على الشارع العام بصفة فرن صمون ---
وضرب خالوا بالف عافية وللعلم ترى الجاي بالكلاصات ياله ايكيج -- أكوا أستكانات بس للنزاكه --- اتريكتوا بألف عافية واليوم خميس والصلاة على النبي -- وشدوا حيلكم وأذا حسيتوا بضيق من وره الريوك نصيحة أتحركوا أشكد متكدرون لئن هية مسئلة وقت ويتحول طاقة --- وصحة وعافية عيوني -- ولا تخافون على هذا دسم ومن هالسوالف التعبانة الخميس كله بركه -- والجمعة معروفة -- عدل وكبل الحمام السوك -- ويطلع شكوا عتيك --
اتمنالكم الصحة والعافية وهنيئا مقدما
واعرف اكوا البعض منكم ايكول شنوا ماكوا غير هاي الأكلات نتريكها
أكوا عيوني بس هاي اللي الها شعبية كثيرة وبالمناسبة أكوا أكلات ألها شعبية كثيرة بس في المحافظات لئن كل محافظة والها تقاليد وعادات
أسعدنا وجودكم عيوني ومية هلا
والجديد قادم أنشاء الله
في امان الله
يمنع النقل والأشهار بدون موافقة
أدارة منتدى العراق
حصريا -- يوميات من أشراح نتريك -- طقوس عراقية - اليوم السادس
الأحد أكتوبر 09, 2011 12:00 am
