السلام عليكم -- صبحكم الله بالخير أغاتي شلونكم شخباركم الكل بخير الحمد والشكر لله
عيوني اليوم وين الريوك
اشراح نتريك -- لك داد أني مشتهي باكلة بالدهن الحر من قدوري داد دا أرهول عليه -- واحد من الشله كله لا خلي نظرب تشريب يم ابوشاهين لو حجي محسن لو يم أبن سمينه شتكولون -- رد عليه اللاخ كله لا خلي نسوكلنه كل واحد نفر كباب معدل يم كباب الربيعي لو تكه لو مشكل على الرصيف يم أبو رائد شلونه تكول حلقوم داد تموع بالحلك لو يم أبو قحطان لو يم أبو جلال شتكولون -- رد عليه الي أيريد باكله بالدهن الحر -- كله داد سهلها ترى ماع قلبي من الجوع -- جاوبه اللاخ كله أذا مايع قلبك من الجوع لعد مابيها مجال خلي نضرب باجه من الحاتي وهي تنشع رويحتك داد -- ها شكلتوا عليها - كله ياله توكلوا عليه بس باجر باكله مابيها مجال عيوني -- وصلوا المطعم الحاتي -- السلام عليكم -ردوا اهل المطعم وعليكم السلام ورحمة الله --وبركاته كل الهلا عيوني اتفضلوا استريحوا
كعدوا -- الله ابو الخير ردوا الله ابو الخير اغاتي
خالو أشتاكلون راس نص راس منابير لو لسان لو مخ لو كراعين أامروني عيوني
جاوب جبير الكعده كله -- خالو احنه 4 نفرات جيبلنه راسين سوي كل راس نصين ويه كل نص نفر لسان ونفر مخ ونفر منابير ولتنسه الكراعين للتمصمص -- خالو داري بالبصل والطرشي ولتنسه فد 10 كرص خبز بدربك للعوازه وياك كاسه معدله سوب
-- رد عليه كله تأمر خالوا بخدمتكم -- صاح الي سجل الطلب على ابو المطبخ -- عبوسي عندك اربع انصاص روس واربع نفرات السان واربعة مخ واربعة منابير وداري ولتنسه الكراعين وكاسة أضافية معدلة سوب غير الضيافة العمامك -- رد عبوسي تأمر سدادي بخدمتك انت والعمام -- وبعدين صاح على ابو الطرشي والبصل والخضره والخبز -- كله حمودي داري عندك من كلشي اربعة بس البصل والطرشي خلي ضعف - وياهن عشر كرص خبز للعوازه
بلشوا
----- ضربوا العمام وتريعوا - وراها ضرب كل واحد أستكانين جاي معدل أمهيل وثكيل صدك مال باجة بالعافية عيوني -- هذا ريوكنا اليوم ---- انتظرونه باجر باكله بالدهن
يمنع النقل والأشهار بدون موافقة
أدارة منتدى العراق
حصريا -- يوميات من أشراح نتريك -- طقوس عراقية - اليوم الأول
السبت أكتوبر 08, 2011 8:06 pm
